Koningskind avonture

In volle glorie het Hy gekom- saggies, onverwags.

Hy het een vir een ou, geroesde herinneringe en eina’s in my gedagtes kom bymekaar maak. In ‘n oomblik het dit gevoel asof alles nuut gemaak is. Asof vlinders en lelies om my dans en nuwe lig my hart se kamers vul. Vanaf diep binne het Sy liefde soos lewende waters gevloei.

Hy het die swaar laken gelig en my geklee met ‘n kleed van vreugde.

Soos die herinneringe van kleintyd terug-flits word dit nie meer versteek deur pyn en speit nie. Ek kan nou weer sien- die mooi, die gelukkig. Ek kan Hom sien.

Ek sien my mamma gesond en vrolik my omhels na ‘n lang skooldag. Ek sien ‘n VOL lewe: Vol harte deel om die kombuistafel, poegaai op die bank le na sportdae, krieket in die agterplaas speel saam boetie, Kersfees-liggies aand-stappies saam die Truters, by pappa leer gaatjies boor met sy groen draaibank… Ek sien ‘n lewe vol familie en vriende wat diep liefhet en omgee.

Hy plaas dan ‘n klein, fyn, goue sleuteltjie in my hand en fluister Sy belofte:” Voorwaar Ek sê vir julle, daar is niemand wat huis of broers of susters of vader of moeder of vrou of kinders of grond ter wille van My en van die evangelie verlaat het nie, of hy ontvang nou in hierdie tyd honderd maal soveel: huise en broers en susters en moeders en kinders en grond, saam met vervolginge, en in die eeu wat kom, die ewige lewe.” (Markus 10:29-30)

Met visie herstel van wie Hy is, dat Hy goed IS en WAS, glo ek nou met volle oortuiging dat Hy ook goed SAL wees.

Goue sleutel van beloftes in die een hand en ‘n mostertsaadjie geloof in die ander staar ek uit oor die nasies. ‘n Braafheid, ‘n hoop, ‘n wete borrel op binne my…

Hy is GOED. Hy was Goed. En GOED sal Hy ALTYD vir my wees.

Die oggendson bring die uitnodiging:

‘Sal jy vandag jou seile span,

die waters in vaar,

vertrou?’

Die bekende ou stemmetjie fluister dan:

vrees, onsekerheid, ongemak…

Daar is skynbare ‘veiligheid’ op die oewer,

droe voete en vertroue op self.

Maar op die horison verskyn die waarheid:

Oor die diepe waters sweef sy Gees,

vreugde heers te midde die storm,

‘n uitnodiging om nat te word,

‘n uitnodiging om te vertrou…

Verruil die wete van wat more inhou,

vir die wete van die Een wat more hou.

‘n vergete van My-probleme, My-gemak, My-toekoms;

vir ‘n avontuur van Sy-hart, Sy-liefde, Sy-toekoms.

vreesloos, vry, vergewe

vaar ek nou die diepe waters in.

In volle afhanklikheid van die Een

wat die waters beveel:

‘Wees stil.’

Ek is getroud aan my beste este maatjie. Ons is op reis in ‘n tydelike tentjie totdat ons eendag by die Huis uitkom. Ek is lief vir blommetjies, ballet en buite-speel; verf, skets en skryf. Ek geniet foto’s neem. Ek is baie lief vir mense, veral kindertjies! Ek het onlangs verander in n tee drinker. Uitdagings wat deurdruk en vasbyt verg maak my opgewonde.

Op daardie noot… na 22 jaar verlaat ek die stille platteland vir ‘n avontuur na die Ooste!

Daar is min dinge wat my so gelukkig maak soos ‘n pen en stukkie papier in die hand. Ek is mal oor die allewige gesoek na die perfekte woorde om ‘n situasie, persoon of utisig te beskryf. Die kuns van ‘n storie inkleur en jou saam neem op ‘n avontuur. Karakters, emosies, geskets deur woorde.

Of dit nou ‘n storie, stukkie kuns, of fotografie is, mag jy daardeur ‘n duideliker prentjie sien van die koning en besef dat om hom te volg is die grootste avontuur!